FSHMN-ja forcon bashkëpunimin ndërkombëtar me Universitetin e L'Aquilas – Hap i rëndësishëm drejt programit Double Degree dhe anëtarësimit në konsorciumin RealMaths
Në kuadër të programit Erasmus+ dhe Memorandumit të Bashkëpunimit ndërmjet Fakultetit të Shkencave Matematike-Natyrore të Universitetit të Prishtinës dhe Universitetit të L'Aquilas (Itali), një delegacion i FSHMN-së, i përbërë nga Prof. Asoc. Kajtaz Bllaca, Dekan i Fakultetit, Prof. Asoc. Behar Baxhaku, Shef i Departamentit të Matematikës, dhe Prof. Assist. Artan Berisha, profesor në Programin e Shkencës Kompjuterike, realizoi një vizitë zyrtare në Universitetin e L'Aquilas.
Gjatë vizitës u zhvilluan takime pune me përfaqësuesit e Universitetit të L'Aquilas, ndër të cilët Prof. Bruno Rubino, Prorektor për Bashkëpunim Ndërkombëtar, Prof. Marco Di Francesco, koordinator i programit ndërkombëtar InterMaths, si dhe Prof. Monica Nesi, profesoreshë në Programin e Shkencës Kompjuterike dhe koordinatore e programit Erasmus+ për mobilitetin e studentëve.
Takimet u zhvilluan në një atmosferë shumë konstruktive dhe u fokusuan në zgjerimin e bashkëpunimit ndërmjet dy institucioneve në fushën e arsimit të lartë, kërkimit shkencor dhe ndërkombëtarizimit. Gjatë diskutimeve u trajtuan mundësitë për rritjen e mobilitetit të studentëve dhe stafit akademik, zhvillimin e projekteve të përbashkëta kërkimore, organizimin e aktiviteteve shkencore ndërkombëtare, si dhe krijimin e programeve të përbashkëta të studimit.
Një nga rezultatet më të rëndësishme të vizitës ishte diskutimi për përfshirjen e Universitetit të Prishtinës në RealMaths Consortium, pjesë e rrjetit ndërkombëtar InterMaths, i koordinuar nga Universiteti i L'Aquilas. Ky konsorcium bashkon universitete prestigjioze nga Evropa, Afrika dhe Azia dhe ka për qëllim zhvillimin e programeve moderne ndërkombëtare të nivelit Master në fushën e matematikës, shkencës kompjuterike dhe aplikimeve të tyre në shkencë, teknologji dhe industri. Në këtë kuadër, Universiteti i L'Aquilas i ka përcjellë Universitetit të Prishtinës dokumentacionin zyrtar për fillimin e procedurave të anëtarësimit në këtë konsorcium ndërkombëtar.
Një temë me rëndësi të veçantë e diskutimeve ishte edhe krijimi i një programi të përbashkët Double Degree në nivelin Master ndërmjet Universitetit të Prishtinës dhe Universitetit të L'Aquilas. Të dy institucionet shprehën gatishmërinë për të punuar në zhvillimin e këtij programi, me synimin që ai të fillojë nga viti akademik 2027/2028, pas përfundimit të procedurave akademike dhe institucionale në të dy universitetet.
Si hap i parë drejt realizimit të këtij objektivi, për vitin akademik 2026/2027 është planifikuar fillimi i mobilitetit të studentëve të nivelit Master. Në fazën e parë pritet që rreth pesë studentë të Fakultetit të Shkencave Matematike-Natyrore të Universitetit të Prishtinës të kenë mundësinë të zhvillojnë një semestër studimi në Universitetin e L'Aquilas në kuadër të programit InterMaths/RealMaths. Ky mobilitet do t'u mundësojë studentëve përvojë akademike ndërkombëtare, qasje në programe moderne studimi, bashkëpunim me profesorë dhe studiues nga universitete partnere evropiane, si dhe përgatitje më të mirë për studimet doktorale dhe tregun ndërkombëtar të punës.
Bashkëpunimi ndërmjet dy universiteteve nuk do të kufizohet vetëm në mobilitetin e studentëve. Ai do të përfshijë gjithashtu shkëmbimin e stafit akademik, organizimin e seminareve dhe shkollave verore, zhvillimin e projekteve të përbashkëta kërkimore, bashkëpunimin në publikime shkencore, si dhe aplikime të përbashkëta në programe të financuara nga Bashkimi Evropian.
Përveç takimeve zyrtare, delegacioni i FSHMN-së pati mundësinë të vizitojë ambientet mësimore dhe kërkimore të Universitetit të L'Aquilas, duke u njohur nga afër me organizimin e programeve të studimit, infrastrukturën moderne dhe praktikat e ndërkombëtarizimit që aplikohen në këtë universitet.
Ky bashkëpunim përfaqëson një hap të rëndësishëm në procesin e ndërkombëtarizimit të Fakultetit të Shkencave Matematike-Natyrore dhe të Universitetit të Prishtinës. Anëtarësimi i planifikuar në konsorciumin ndërkombëtar RealMaths dhe zhvillimi i programit Double Degree do të krijojnë mundësi të reja për studentët dhe stafin akademik, duke rritur cilësinë e studimeve, kërkimit shkencor dhe bashkëpunimit ndërkombëtar. Në të njëjtën kohë, FSHMN-ja vazhdon të forcojë pozicionin e saj si një partner aktiv dhe i besueshëm në rrjetet akademike evropiane, duke u ofruar studentëve programe moderne, mobilitet ndërkombëtar dhe mundësi të reja për zhvillim profesional e akademik. Ky është një tjetër hap i rëndësishëm në realizimin e vizionit të Fakultetit për një arsim të lartë cilësor, të hapur dhe plotësisht të integruar në Hapësirën Evropiane të Arsimit të Lartë.
